Naiditra am-ponja ny lehilahy iray malaza ratsy amin’ny halatra omby ao Antsohihy, ny talata 9 avrily teo. Nahatrarana omby mitotaly 116 tsy nisy taratasy tao amin’ny valan’io lehilahy io ka nosamborin’ny mpitandro filaminana izy. Nogiazana am-balam-pamonjana avokoa ireo omby ireo.
Zaza fito taona maty tsy tra-drano voadonan’ny fiara mpitatitra tao amin’ny fokontany Besisika Borizany, faritra Sofia, afakomaly. Nirava avy nianatra teny amin’ny EPP io zazavavy io no voafaokan’ny taksibrosy mampitohy an’Antananarivo sy Nosy Be. Natao andrimaso ilay mpamily ny fiara.
Nokirakirain’ny jiolahy ny taolam-balon’ny
razana miisa 35 nandritra ny vaky fasana tao Bevomanga, fokontany Andrefambohitra, distrikan’i Mahitsy, afakomaly. Mpandroaka omby maraina no nahatsikaritra ny fasana efa tsy nihidy intsony.
Olona folo nosamborin’ny polisy eo anivon’ny kaomisaria Alasora, ny 8 avrily teo. Nangalatra fitaovana tao amin’ny fitoeran’entan’ny orinasa lehibe iray izy ireo. Nosakan’ny mpitandro filaminana ny fiara ka tratra ireo entana fampiasa amin’ny orinasa afakaba sy ny olona folo voalaza hividy izany.
French