Namaly ny fangatahan’ny klioba Amical bouliste Mandrosoa Ivato (Abmi), ny Federasiona sport boule malagasy (FSBM). Taorian’ny fandinihana ny lalàna mifehy ny tsipy kanetibe, malagasy sy ny iraisam-pirenena, tsy mitombina ny fitorian’izy ireo.
Tsy nahazo rariny ny fangatahana hanintsanana ny ekipan’ny Union bouliste Manjaka (UBM), tompon’ny amboaran’i Madagasikara 2024, taranja tsipy kanetibe, nataon’ny Amical bouliste Mandrosoa Ivato (Abmi). Nambaran’Andrianirina Adrien, filoha mpitantana ny Federasiona, tamin’ny mpanao gazety, omaly, tetsy Tsiazotafo, fa 2 andro taorian’ny fahavitan’io fifaninanam-pirenena io, natao tany Antsirabe, ny 5 – 7 avrily lasa teo, nandefa taratasy ny filohan’ny klioba Abmi, Razafinarivo Miarimanana, ny hanesorana ny anaram-boninahitra azon’ny UBM. Voalazany fa tsy ara-dalàna ny fifindran-toeran-dRazafinirina Jeannie Alexander.
Nijery ireo andinin-dalàna sy fitsipika iraisam-pirenena sy malagasy mifehy ny tsipy kanetibe ireo komity mpitantana ny FSBM, nivory tao Mahamasina, ny alarobia lasa teo. Rehefa nodinihina tamin’ ny antsipiriany, tsy azo raisina ny fangatahana nataon’ity klioban’ny Mandrosoa Ivato ity. Voamarin’ ny andininy faha-31 ao amin’ny Federasiona iraisam-pirenena sy ny Federasiona nasionaly mpikambana, nankatoavina ny volana desambra 2020, izany. Voalaza ao anatin’izany, fa atao amin’ny mpitsara ny fitarainana rehetra. Tsy azo raisina intsony izany raha toa ka tontosa hatramin’ny farany ny lalao.
Araka izany, notazomina sy nankatoavina ny vokatra tamin’iny fiadiana ny amboara iny. Hisolotena an’i Madagasikara amin’ny fiadiana ny ho tompondakan’i Afrika, hatao any Maroc, ny 6 – 9 jona ho avy izao, ny ekipan’ny UBM, nisy an’i Faly Donald sy i Hery Nirina ary i Jeannie Alexander. “Hiankina amin’ny fanalan-tsazy avy amn’ny Federasiona iraisam-pirenena, izay antenaina fa ho voafafa nefa izany”, hoy ny filohan’ny FSBM.
Torcelin
French