TSELATRA

Taxi-be zotra E nifatratra tamin’ny andrin-jiro teny By-pass, omaly. Nandeha mafy io fiara io ka tsy voafehin’ny mpamily intsony. Naratra ny mpandeha sasantsasany tao anatin’ny fiara. Tsy nisy ny aina nafoy.
Maty navadiky ny lakana ny lehilahy iray tao Mamamba, Ambohibao, afakomaly hariva. Nifam­pitadiavan’ny ekipan’ny Sampana mpamonjy voina izy. Niezaka namonjy azy ny manodidina sy ny mpitandro filaminana saingy tsy avotra intsony ny ainy.
Fasana miisa dimy novakian’ny jiolahy tao Ambohimamory, kaominina Ambohimasina, distrikan’ Arivonimamo, ny alahady 28 avrily lasa teo. Lasa avokoa ny taolan-dava tamin’ny razana miisa 86 tao anatin’ireo fasana lasibatra. Karohina ny nahavanon-doza.
Lavon’ny balan’ny mpitandro filaminana ny dahalo iray tao Madirovalo, distrikan’Ambatoboeny, ny faran’ny volana avrily teo. Mpangalatr’omby sy tompon’antoka tamin’ny fanafihana maro tao an-toerana ity maty ity, nifandona tamin’ny zandary.