Naratra voan’ny tora-bato teo amin’ny teta-masony, ny zandary iray nandritra ny fitokonan’ny mpianatry ny Oniversite an’Antananarivo, teny Ankatso, omaly. Nidina an-dalam-be, nitsoaka kiririoka nanohy ny fihetsiketsehany ireo mpianatra. Raikitra ny tora-bato nataon’ireo mpianatra nanoloana ny mpitandro filaminana. Niezaka nifehy ny fandriampahalemana teny amin’ny manodidina ny zandarimaria, ny maraina. Voatoraky ny vato nataon’ireo mpianatra anefa ny zandary iray ka naratra mafy. Fotoana vitsy taorian’io, nanatevin-daharana ny zandarimaria teny an-kianja ny ekipan’ny polisim-pirenena. Mpitandro filaminana iray voalaza nanao fanamiana sivily voasambotry ny mpianatra tao amin’ny faritry ny toeram-pianarana.
Niditra ny toeram-pianarana
Nanao rodobe nihazo niditra ny faritry ny toeram-pianarana ny mpitandro filaminana. Naka ilay lehilahy iray notanan’ ny mpianatra izy ireo. Nohafahan’izy ireto farany io voalaza ho mpitandro filaminana nanao fanamiana sivily io. Marihina, takin’ireo mpianatra ny vatsim-pianarana dimy volana feno miampy ny fampitaovana sy ny fanatsarana ny kalitaon’ny “connexion”. Miantso ny fitondram-panjakana hijery ifotony ny fahazoan-drano madio eny amin’ny faritry ny Oniversite koa izy ireo.
Tsiferana R.
French