Nametraka be ho an’ny kolontsaina: nifindra tontolo ny Tsimitoviaminandriandehibe Xhi

Xhi sy M’aa. Anarana mitakosina amin’ny tantaran’ny zavakanto sy ny kolontsaina malagasy izany. Nifindra tontolo i Xhi, nodimandry ny alarobia lasa teo. Banga ny tontolon’ny kolon­tsaina.

«Noho ny fihavanana dia mampan­dre anareo izahay fa niamboho
ny Tsimitoviaminandriandehibe Rajao­fetra Guy », hoy ny fianakaviany.Toy ny vara-datsaka ny vaovao ho an’ny tontolon’ny zavakanto sy ny kolon­tsaina, satria ny iray amin’ireo andrarezina no lavo. Nifindra any amin’ny tontolo hafa i Xhi, ilay mpanakanto maroafitsoka nitondra rivo-baovao teto Mada­gasikara tany amin’ny fiandohan’ny taona 70 tany. Poeta, mpanoratra, mpamoron-kira sy mpihira, mpanao hosodoko, mpikaroka ny tantara sy ny fomban-drazana, mpikaroka momba ny teny sy ny niandohan’ny olombe­lona, injeniera eo amin’ny sehatry ny fizika, nandalina manokana momba ny fanandroana, sikidy, sns.
Ny « Besorongola », « Voankazo manta kisoka », hiran’i Xhi sy M’aa, nahafantarana azy ireo voalohany. Rehefa avy nanohy ny fianarana tany ivelany, niverina an-tanindrazana ka sady nitondra ny rivo-baovaon’ny mozika, no nivoy ny maha Malagasy. Nitondra ihany koa ny solon’anarana Dia-dio Rasalama ihany koa i Xhi raha toa ka Dia Hanitrinielabe kosa ny an’i M’aa. Taorian’ny nahazoan’izy ireo zafy anefa, navadika ho M’aa sy Xhi indray no fian­tsoana azy…

Nitazona andraikitra lehibe

Ny tontolon’ny hosodoko no tena nipetra­han’ny ny anaran’i Xhi sy M’aa. Anarana tsy nisaraka intsony vao nikambana, satria nifa­meno ary niarahana avokoa izay natao ho an’ izy mivady. « Faratampon’ny zavatra misy ny zavakanto, hamoahana ny zavatra tsy voa­voaka. Andraikitra lehibe amin’ny fiarahamo­nina ka tsy maintsy havoaka ilay kolontsaina avy amin’Andriananahary », hoy i Xhi.

Nanakorontana ny rafitra efa napetraky ny sasany ireo voka-pikarohana novoizin’i M’aa sy Xhi, indrindra mahakasika ny niandohan’ny Malagasy sy ny teny malagasy. Nisy ireo nanao ho fihomehezana izany, kanefa nanongilan-tsofina sy nanopy maso ihany. Tsy nampihemotra an’i M’aa sy Xhi izany, satria efa fantatr’izy ireo ela ny andraikitra nomen-Janahary azy ireo. Ao amin’ny rovany eny Ambohiman­droso, no misy ny nofo mangatsiakan’ny Tsimi­toviaminandriandehibe Xhi. Hafenina ny ala­hady izao eny Vinany Ambohimamory izy.

Zo ny Aina