Hafa noho ny fahita hatramin’izay! Volana jona, hanamarihina ny « Iray volan’ny teny malagasy ». Ho an’ity taona ity, hisy hetsika lehibe hotanterahina ny 1 jona, manomboka amin’ny 10 ora maraina, eny amin’ny zaridainan’Andohalo. Fotoana hanasongadinan’ny kanto telo mampiavaka ny kolontsaina malagasy: kabary sy hiragasy ary varibemenaka.
Haneho ny hasin’ny teny malagasy ry zareo avy ao amin’ ny Fikambanan’ny mpikabary malagasy maneran-tany (Fi.Mpi.Ma maneran-tany). Ho an’ny hiragasy, hifandona sy haneho ny maha lova sarobidy ny teny malagasy ao anatin’ny hiragasy ny tarika Razafindramanga Berthine avy any Ambohimanjaka sy Rakotomavo Pierre avy any Ambatoantrano. Hifanindran-dalana amin’ ireo ny fahaizan’ny Malagasy mampiasa ireo zavaboahary eo aminy ka ahafahany mahandro ny varibemenaka.
Anisan’ny zavakanto sy kolontsaina malagasy telo mifameno sy mifanaraka hatrany ny kabary sy ny hiragasy ary ny varibemenaka. Amin’ny fotoam-pamadihana, ohatra, hialohavana kabary ny lanonana. Arahina fihinanana varibemenaka sady mihanoka ny hiragasy.
HaRy Razafindrakoto
French