Misongadina tanteraka ny Malagasy mpilalao amin’ny fifaninanana Acnoa, faritra fahafito izay atao ao Seychelles, sokajy lehilahy sy vehivavy, U18. Nandrombaka ny medaly volamena teo amin’ny taranja basikety 3×3 ny ekipam-pirenena Ankoay, lahy sy vavy, omaly, nandritra ny famaranana.
Ny vehivavy mpilalao, nanamontsana an’i Seychelles, mpampiantrano, tamin’ny isa mavesatra 21 no ho 0 raha toa ka lavon’ny lehilahy Ankoay, 21 no ho 9 i Comores. Tsy mbola resy mihitsy ireto mpilalao voafantin’i Madagasikara ireto nandritra ity fifanintsanana ity. Tsiahivina fa teo amin’ny manasa-dalana, resin’ny Ankoay vavy, 21 no ho 1, i Comores. Nahintsan’ny Ankoay lahy, 21 no ho 3, kosa i Seychelles.
Tsara marihina fa hifarana anio, any an-toerana, ny lalao Acnoa, faritra fahafito. Tsara ny mampahatsiahy fa nanomboka ny 6 mey teo ny fifanintsanana. Ankoatra ny basikety 3×3, nandray anjara tamin’ny Beach-volley sy tenisy ambony latabatra ary lomano ireo atleta malagasy 24 tonga tany an-toerana.
Fitia Randria
French