Nibaradaka teo am-piandrasam-paty ny lehilahy iray ahina ho nanome poizina tao Fenoarivo Doany, ao Fenoarivo Atsinanana, ny alarobia 8 mey lasa teo. Nilaza ho nanenina ny zavatra nataony teo anoloan’ilay namany namoy ny ainy izy…
Nisehoana trangan-javatra tsy mbola fahita tao amina fiandrasam-paty tao Fenoarivo Doany, ao Fenoarivo Atsinanana, ny alarobia lasa teo. Lehilahy iray 45 taona no maty nisy nanome poizina. Mangana tsy nisy namantarana azy intsony ilay niharam-boina, tsy vitan’izay fa nibontsina be koa ny vatany hatrany amin’ny lohany. Raha ny angom-baovao voaray, nisy asa tanamaro niarahana tamin’ny olona maromaro ny alarobia 8 mey 2024 teo. Niara-nisotro toaka tamin’ny mpiara-monina ity lehilahy ity. Nony tonga tao an-trano anefa, sady nitaraina narary izy no nikiakiaka tsy nisy toy izany. Mipetra-drery rahateo izy fa tsy manam-bady aman-janaka. Nentina teny amin’ny hopitaly izy saingy tsy avotra intsony ny ainy. Tsy vitan’izay fa nivadika maintibe sady nibontsina ny tarehiny. Nivoaka ra ny orony sy ny sofiny. Tapaka ny tendany.
Lehilahy iray saika niharan’ny fitsaram-bahoaka
Nampiahiahy ny fianakaviany anefa ny zava-nanjo azy, kanefa tsy nisy olona noahiahiana izy ireo. Niaretan-tory ny razana ny alakamisy 9 mey alina. Iny nisy lehilahy iray anisan’ireo niari-tory nanao fihetsika hafahafa. Nanatona ilay razana io lehilahy mpiara-monina io sady niteny hoe : « tsy nampoiziko hahafaty anao iny zavatra nomeko anao iny. Nanenina tanteraka aho ». Hatairana ny an’ireo mpiandry faty naheno azy niteny izany. Naverimberiny fa nanenina izy ka nilaza fa tsy fanahy iniany fa misy ody ratsy napetraky ny ray aman-dreniny tao aminy. Saika niharan’ny fitsaram-bahoaka ity lehilahy nitonon-tena ity. Vao mainka aza izy nitanisa fa hoe mbola maro ny olona ao anaty lisitra tiany hovonoina.
Sajo/J.C
French