Nitrangana lozam-piarakodia indray teny Ambohitrimanjaka, omaly tokony ho tamin’ny 10 ora maraina. Fiara marika Mercedes iray no nivadibadika tany an-tanimbary. Naratra mafy ny mpamily, tsy vitan’izay fa mpandalo iray voafaokan’ ilay fiara ka naratra mafy ihany koa. Nandalo an’Ambohitrimanjaka hihazo an’Andranotapahana ity fiara ity kanjo tra-doza tampoka. Voalazan’ireo olona nahita ny fitrangan’ny loza teny an-toerana fa vokatry ny fandehanana mafy no nahatonga ny loza. Tsy voafehin’ny mpamily intsony ny familiana. Vokany, nifaoka olona sy nivadibadika tany an-tanimbary ny fiara. Mafy ny fivadibadihana satria tafahitsoka tao anaty fiara ny mpamily. Ireo mponina eny an-toerana aza no nifanome tanana tamin’ny famadihana ny fiara sy namoaka ny mpamily avy ao anaty fiara. Nentina haingana namonjy hopitaly ireo naratra. Potipotika tanteraka ny vatan’ilay fiara Mercedes.
J.C
French