Tratra ny tanjona ho an’ny mpikarakara ny fampisehoana « Tsinjaka be » tetsy amin’ny Coliseum Antsonjombe, omaly, tonga marobe ireo mpankafy. Hetsika nokarakarain’ny Global Action.
«Tsy nahasakana ny seho loatra ny fampielezan-kevitra ara-politika sy ny seho maimaimpoana teto an-drenivohitra satria namaly ny antso avokoa ny mponin’Antananarivo», hoy ny mpitantana eo anivon’ny Global Action, Randimbison Orlando. «Amin’ny maha tsinjaka be ny seho, tsy mifidy gadona, tsy mifidy olona fa samy nomena ny anjarany avokoa na ny tanora na ny olon-dehibe na ny ankizy», hoy hatrany izy. Nezahina ny tsy hisian’ny mpanakanto miverimberina teny ambony sehatra. Nandray anjara nanafana izany ireo mpanakanto kalaza maro nanerana ny faritr’i Madagasikara. Anisan’izany ry Dadi love, Lion Hill, Nael, Agrad, ny tarika Sabata Andavamamba… “Nanana adiny iray latsaka, teo anelanelan’ny 45 hatramin’ny adiny iray sasany teo ho eo ireo mpanakanto nahafahany nanome fahafam-po ny mpijery”, hoy hatrany
ny mpikarakara ny hetsika. Nisokatra tamin’ny valo ora maraina ny vavahady teny an-toerana, nifarana tamin’ny 6 ora hariva teo ny seho.
Fotoana hialana voly
“Andro fanararaotana hialana voly ny fotoan’ny fety tahaka izao, fotoana ihany koa ahafahana mijery fampisehoana satria mora ny vidim-pidirana”, hoy ny mpankafy iray nanontaniana. Ankoatra izay, natao hialana amin’ny rotorotom-piainana andavanandro ihany koa ny fotoana toy izao, hoy hatrany ireo mpankafy. Nankafizin’ny mpijery ny ankamaroan’ireo mpanakanto ka antony nandrisika azy hijery ny fampisehoana. Hitohy hatrany toy ny isan-taona ny fitetezam-paritra ataon’izy ireo. Andrasana indray ny seho ho an’Antananarivo amin’ny fotoana akaikin’ny faran’ny taona. Mikendry ny mpanakanto iraisam-pirenena indray ny mpikararaka amin’ny taona ho avy, raha ny fanazavana voaray hatrany.
Mino
French