Lazaina fa « Fasan’ny tetikasa » ny tapany atsimon’ny Nosy, ary vao mainka miharatsy ny zava-misy. Maika ny hamahana izany, izay efa misy ny tetikasa vonona hampiasa vola any an-toerana.
Nitatitra ny Banky iraisam-pirenena fa ianjadian’ny fiovan’ny toetr’andro sy ny loza voajanahary any Atsimo. Miaina anaty fahantrana ny 91% ny mponina any Atsimo Andrefana, Anosy ary Androy, araka ny antontan-taratasy lasitra ho an’ny fiaraha-miombon’antoka amin’i Madagasikara 2023-2027.
Manamafy ny filohan’ny vovonana Hanavotra an’i Toliara (Hato), Erody Dignot, fa tsy mitsaha-mitotongana ny fari-piainan’ny mponina any Atsimo Andrefana. Mihena ny fidiram-bola nefa tsy midangana ny vidin-javatra tena ilain’ny mponina (PPN). Mihena ny vokatry ny fambolena sy ny fiompiana ary ny jono any ambanivohitra, ka mirona any amin’ny asan-jiolahy ny olona sasany.
Mitarika fikambanana maromaro any Toliara i Motata. Toy ny Fikambanan’ny mpitarika posy any Toliara, ny Fikambanan’ny mpitatitra Toliara (FIPITO) ary ny VFMT, izay vovonana mamondrona fikambanana miisa 64 ho fampandrosoana an’i Toliara. Nambarany fa manana harena voajanahary mihoapampana any Toliara. Tsy mitsaha-mitombo ny isan’ny mponina satria maro ny mpifindra monina tonga any, saingy tsy misy ny asa, izay mila vahana haingana.
Tetikasa harena an-kibon’ny tany
Nomarihiny fa «nanome toky hijery ny sosialim-bahoaka ny fanjakana, koa andrasanay ny fanatanterahany azy. Tsy misy anefa ny fampandrosoana raha tsy misy ny fotodrafitrasa, ny orinasa ary ny asa ».
Nanamafy izany i Erody Dignot, fa vahaolana voalohany ny famoronana orinasa mba hanome asa ny tanora. Efa misy ny tetikasa vonona hampiasa vola amin’ny harena an-kibon’ny tany. Manana tetikasa sosialy amin’ny fanabeazana, ny fahasalamana ary manampy ny mponina izany tetikasa izany.
Anisan’ny mampiavaka ny faritra Atsimo Andrefana tokoa ny sehatry ny harena an-kibon’ny tany. Maro ny tetikasa fampiasam-bola vaventy efa nanomboka tany an-toerana, saingy tsy nitohy. Izany no mahatonga ireo fikambanana isan-tsokajiny any an-toerana mitaky ny hamerenana azy ireny, mba hiteraka asa ho an’ny mponina any ifotony, indrindra ho an’ny tanora.
Njaka Andriantefiarinesy
French