Nahazo fanampiana ara-bola, mitentina 1 142 661 dolara, avy amin’ny Tahirimbola iraisam-pirenena momba ny tontolo iainana (FEM) i Madagasikara. Hampiasana azy ny tetikasa « Tohana entina hiampitan’i Madagasikara any amin’ny fitaterana elektrika ». Maharitra 4 taona ity tetikasa tohanan’ny FEM ara-bola ity. Hatao eto Antananarivo sy Toamasina ny tetikasa andrana. Ao anatin’izany ny fametrahana fomba ara-barotra ho an’ny sehatra tsy miankina hanafarana sy hampiasana ny fiara na moto mandeha amin’ny herinaratra eto Madagasikara, satria tsy mandoto ny rivotra sy ny habakabaka entina hiarovana ny tontolo iainana. Eo koa ny fikarohana rafitra ara-bola ahafahana manitatra izany manerana ny Nosy. Hisy ny fanentanana sy ny fampahalalana ny besinimaro mikasika ny fiara elektrika.
Fiovan’ny toetr’andro
Mitarika ny fanatanterahana ny tetikasa ny minisiteran’ny Tontolo iainana sy ny fampandrosoana maharitra (Medd), sy ny minisitera vokasika, toy ny ao amin’ny Fitaterana (MTM), ny Angovo (MEH), ny Toekarena (MEF). Miara-miombon’antoka ara-bola sy ara-teknika ny Sampandraharahan’ny firenena Mikambana momba ny tontolo iainana (PNUE).
Mifanaraka amin’ny « Fifanarahana lasitra ny ONU mikasika ny fiovan’ny toetr’andro » sy ny « Fifanarahan’i Paris momba ny toetr’andro » ity tetikasa ity.
Njaka A.
French