Tokony hatao mifanaraka amin’ny zava-misy ao anatin’ ny firenena iray amin’ny lafiny kolontsaina sy sosialy ny votoatin’ny fanabeazana ara-pananahana feno (éducation sexuelle complète). Io ny toromariky ny Tahirin’ny Firenena mikambana momba ny mponina (UNFPA), izay miara-miasa amin’ny firenena maro aty Afrika amin’ny fahasalamana ara-pananahana sy ny fanabeazana aizana, hoy ny nambaran’ny mpanolotsaim-paritry ny UNFPA miasa aty Afrika misahana ny fandaharanasan’ny fanabeazana aizana, Dr Chilanga Asmani. Nohamafisiny fa volavolaina araka ny taona ny fahalalana hozaraina amin’ny ankizy sy ny tanora raha hiresaka fanabeazana ara-pananahana feno. Zava-dehibe ny fiaraha-miasa amin’ny minisiteran’ny Fanabeazam-pirenena satria fanabeazana no hatao ary any an-dakilasy ny androtokon’ny fotoanan’ny mpianatra. Mila maneho hevitra koa ny ray aman-dreny momba io lohahevitra io satria ny zanany no iantefan’ny fanabeazana. Marolafy ny fanentanana ka samy tokony hijerena avokoa ireo araka ny fahitany azy.
Nandritra ny fivoriana ampitain-davitra niarahana amin’ ireo mpanao gazety mpikambana amin’ny tambajotran’ny mpampahalala vaovao aty Afrika misehatra amin’ny fahasalamana sy ny tontolo iainana (Remapsen) no nizarany izany. Mpikambana ao anatin’ ny tambajotra i Madagasikara. Niompana tamin’ny fampiharana ny lalàna momba ny fananahana ara-pahasalamana sy ny fandrindram-piterahana SR/PF aty Afrika andrefana sy afovoany ny famelabelarana nandraisan’ny firenena aty Afrika anjara.
Vonjy
French