Mandalo eto indray i Julien Lepers. Midika izay fa efa akaiky ny « Festival des baleines », izay hiditra amin’ny andiany fahafito amin’ity.
Tsy mahafoy an’i Madagasikara ! Ray mpiahy ny « Festival des baleines » fanao any Sainte-Marie ilay mpanolotra fandaharana malaza maneran-tany, i Julien Lepers. Nanatrika ny andiany maromaro tamin’ity hetsika mampivondrona ny fizahantany, ny kolontsaina ary ny fanatanjahantena ity izy. Fantatra fa eto Antananarivo indray i Julien Lepers amin’izao fotoana izao, ary nihaona tamin’ireo mpanao gazety, omaly.
Nampahafantarina tamin’izany fa hisy ny takariva « Quizz », anio. Mandritra ny fiaraha-misakafo izay tafiditra anatin’ny fanomanana ny « Festival des baleines » izany, hatao etsy amin’ny Radisson Blu, Ambodivona. Hitarika ny fotoana toy ny tamin’ireny lalao « Questions pour un champion » ireny i Julien Lepers. Amin’io fotoana io ihany koa no hanambarana amin’ny fomba ofisialy ny fandaharam-potoanan’ny hetsika izay hatao any Sainte-Marie, ny 13 hatramin’ny 21 jolay ho avy izao. Ny mahakasika indrindra ny lafiny zavakanto sy kolontsaina ary ny fifaninanana ara-panatanjahantena ireo hampahafantarina ireo.
Anisan’ireo hetsika mahasarika mpizahatany vahiny be indrindra aty Madagasikara ny « Festival des baleines ». Efa maro ireo nisafidy ny Nosy Sainte-Marie rehefa fotoana fandalovan’ireo trozona, saingy nitombo isa izany vao nisy ny hetsika. Feno tanteraka ny fotoana mandritra ireo 9 andro ireo, satria hifandimby ny safari baleines, fampisehoana ankalamanjana sy anaty efitrano, fifaninanana hatsarambika, lalao nentim-paharazana, fanentanana mahakasika ny tontolo iainana, sns. Tsy hadino ilay « carnaval » efa lasa fanao mampiavaka ny hetsika, izay haka endrika fifaninanana ho an’ireo tompon-tany ihany koa izany. Anisan’ ny vaovao amin’ity andiany ity ny fisian’ny « village », izay toerana hivondronan’ny hetsika rehetra mandritra ny 9 andro. Eo avokoa no hitranga ny fanentanana sy fampisehoana, ny fifaninanana asa tanana : sokitra, peta-kofehy, sns. Eo ihany koa ireo tranoheva maro, ahitana ny haify, ny taozavatra, fitafiana, sns. Homena sehatra manokana ihany koa, amin’ity andiany fahafito ity, ny hainahandro malagasy. Hasongadina ireo sakafo vokatra eto Madagasikara mandritra izany.
Zo ny Aina
French