Notanterahina teny amin’ ny Lapan’ny fitsarana Anosy, efitrano fahefatra, ny fotoam-pitsarana nandraisan’ny fitsarana ny fianianan’ireo mpahay kaonty sy ara-bola (experts-comptables et financiers) 12 mianadahy. Andro lehibe ho an’ny Holafitry ny mpahay kaonty sy ara-bola ihany koa ity fotoana ity, nahafahan’ny filohan’ny holafitra nampahalala ny tsara ho fantatra rehetra tamin’ireto 12 mianadahy nanao fianianana ireto. « Mitaky fitondrantena mendrika fa tsy fombafomba fotsiny ihany ny asan’ny mpahay kaonty sy ara-bola », hoy ny filohan’ny holafitra, Rabenoro David. Nanamafy izany rahateo koa ny hafatrafatra nomen’ny teo anivon’ny fampanoavana ambony, namelabelatra tamin’ireo mpahay kaonty fa asa mitaky adidy sy andraikitra ny asan’ny mpahay kaonty sy ara-bola. Misy ny andraikitra arakasa sy sivily ary ara-keloka raha misy tsy fahatomombanana, raha ny fanazavan’ny fampanoavana ambony. «Miankina aminareo ireo ny fahamarinana ara-bola eo anivon’ ny orinasa sy ny firenena», hoy hatrany ny fanazavany. Misy lalàna ny asan’ny mpahay kaonty sy ara-bola. Tsy ampy ny fananana mari-pahaizana fa tsy maintsy manao fianianana, araka ny fanazavan’ ny Sekretera jeneralin’ny Holafitry ny mpahay kaonty sy ara-bola, Razakamahefa Hajanirina. « Ny mpahay kaonty sy ara-bola ihany no olona afaka miandraikitra ny fitantanana ara-bola amina orinasa iray. Manampy ihany koa izy ireo amin’ny fanarenana ny orinasa raha sendra misy fahasarotana ny fitantanana », hoy izy.
Jean Claude
French