TSELATRA

Naratra mafy ny lehilahy iray nandeha bisikileta notrongisin’ny taxi-be teo Soanierana, omaly tolakandro. Mafy ny fifandonana satria tafatsofoka tao ambany fiara mihitsy ilay bisikileta. Nipitika ihany koa ilay lehilahy ni­tondra azy. Naratra mafy izy ka voatery nentina haingana namonjy toeram-pitsaboana. Tonga teny an-toerana ny polisy nanao fanadihadiana.
Tapaka nandritra ny ora maromaro ny lalam-pirenena faharoa (RN2), ny sabotsy teo, noho ny fivadihana kamiaobe iray tao Marovoalavo. Tsy nisy afaka nandeha ny fiara rehetra na ireo ho any Toamasina na ireo hiakatra aty an-drenivohitra.
Kila hotohoton’ny afo ny tranombarotra lehibe iray ao Antsohihy, omaly maraina. Lasa namonjy lamesa vao maraina ny tompon’ity magazay ity no niverina nihazakazaka noho ny fahamaizan’ny trano. Tsy misy mpamonjy voina rahateo ao an-toerana ka ireo mponina no nifanome tanana tamin’ny famoahana ny entana sy namono ny afo. Nisy ihany ireo entana tafavoaka saingy may tanteraka ny trano.