« Lesoka goavana amin’ny fampiroboroboana ny sehatry ny fizahantany ny fitaterana ana habakabaka », hoy ny filohan’ny filankevi-pitantanan’ny Conféderation du tourisme de Madagascar (CTM), sady filoha lefitry ny Groupement des entreprises de Madagascar (GEM), Razafimahefa Tojo Lytah, tao amin’ny RFI. Nambarany fa lasa takalonaina ny sehatry ny fizahantany sy ny toekarena eto Madagasikara noho ny zava-misy eo amin’ny fitaterana ana habakabaka. Miisa roa monja ny fiaramanidina manana seza 70 amina firenena manana mponina hatrany amin’ny 28 tapitrisa. Tsy ekena, hoy izy, ny zava-misy toy izany, indrindra ny tsy fananana fiaramanidina azo antoka ho an’ny fampahafantarana an’i Madagasikara eo amin’ny sehatra iraisam-pirenena. Ankoatra izay, notsindriny manokana ny fahapotehan’ny lalana eto amintsika izay sakana ho an’ny famarotana ny fizahantany. Vidina lafo ny fotoana, izany hoe, sakana ho an’ireo manan-draharaha eto an-drenivohitra sy ho an’ireo mpisehatra samihafa avy any amin’ny faritra hihazo eto an-toerana ny fahasimban’ny lalana. Mitangorona eto Antananarivo rahateo ny ankamaroan’ny biraom-panjakana. Noho izany, manao antso avo sy manaitra ny fitondram-panjakana ny sehatra tsy miankina mba hijery ny zava-misy. “Tsy vita ao anatin’ny herintaona ny fanarenana ny sehatry ny fizahantany fa aman-taonany maro miaraka amina paikady mahomby sy mafonja”, hoy hatrany ny filoha lefitry ny GEM. Tsiahivina fa tanjon’ny fitondram-panjakana ny hampitombo hatrany amin’ny 1 tapitrisa ny mpizahatany ho avy eto Madagasikara, ny taona 2028.
Henintsoa H.
French