“Nanome toky ny Ceni fa ny fikirakirana ny valim-pifidianana dia natao tao anatin’ny fanajana ny safidim-bahoaka sy ny fangaraharana tanteraka, ka heverinay fa hitondra fitoniana sy filaminana.” Izay ny nambaran’ny filohan’ny Ceni, Andrianarisedo Dama Arsène, teny Alarobia, omaly, taorian’ny fanambarana ampahibemaso ny voka-pifidianana vonjimaika. Vokatra vonjimaika ihany no navoakan’ny Ceni, fa ny Fitsarana avo momba ny lalàmpanorenana (HCC) no mamoaka ny voka-pifidianana ofisialy. Mba ho ao anatin’ny fitoniana sy filaminana ary fifanajana no iandrasana izany. Hihamafy orina ny demokrasia eto Madagasikara, ary tsy ho faty momoka ny ezaka natao.
Nalalaka ny fahazoan’ny kandidà nanao fampitaham-bokatra izay nahatratra 1 257. Ho fanajana ny rijan-tenin-dalàna velona sy ny soatoavina mibaiko ny asan’ny Ceni, indrindra hampilamina ny sain’ ireo mpirotsa-kofidina eo am-piandrasana ny voka-pifidianana: tsy nisy natosi-bohontanana ireo kandidà nangatahana fampitahana fitanana an-tsoratra (PV) nandritra ny fikirakirana ny voka-pifidianana. Fampitahana tamin’ny PV an’ ny Ceni ny PV eny an-tanan’ny kandidà no natao. Tamin’ ireo PV tsy nanaovana fampitahana, nohamafisiny fa ny voka-pifidianana vonjimaika avoakan’ny Ceni dia miainga amin’ny fikirakirana ny PV natokana ho an’ny Ceni, izay nalefan’ireo mpikamban’ny biraom-pifidianana tao anatin’ny valopy tsy azo sokafana.
R. Nd.
French