Namoy ny ainy teo no ho eo ny raim-pianakaviana iray nitondra kodiaran-droa teny Fenoarivo, anatin’ny lalam-pirenena voalohany, afakomaly alina. Hamonjy fodiana, niharan-doza tampoka io lehilahy io. Nidona mafy tamin’ny sisin’arabe ny moto nentiny, araka ny nambaran’ireo nanatri-maso. Nitsirara teo afovoan-dalana ilay lasibatra. Tsy nahetsika intsony izy. Tsy nisy aina intsony. Tsy nahitana ratra loatra ny vatany saingy ahina ho voa mafy raha ny dona nahazo azy. Niezaka nitondra azy teny anivon’ny hopitaly ny fianakaviany rehefa nahare ny loza. Tsy tana intsony anefa ny ain’io lehilahy io. Tsiahivina, lehilahy iray hafa koa, mpitondra moto matin’ny lozam-pifamoivoizana teny amin’ny lalana mihazo an’Andakana, anatin’ny RN4, ny alahady 9 jona teo. Mbola tafarina io lehilahy io tamin’ny fotoana nitrangan’ny loza saingy nahatsapa fanina. Nentin’ny nanatri-maso nihazo ny hopitaly manara-penitra Anosiala izy. Voadona mafy tao amin’ny taolan-damosiny ka nitarika ny fahafatesany.
Tsiferana R.
French