Ela ny ela, nisy tompom-bady sahy nijoro ka nanontsana ny fampirafesana sy fampijaliana natao azy. Raim-pianakaviana iray sy ny sakaizany, izay niterahany roa, no naiditra am-ponja.
Naiditra am-ponja, ny alatsinainy lasa teo, ny raim-pianakaviana iray sy ny sakaizany na ny vadikeliny. Notorian’ny tompom-bady izay vita mariazy taminy ilay rangahy. Efa nisara-toerana nandritra ny taona vitsivitsy izy roa ka nanorina tokantrano imaso tany an-kafa ilay lehilahy. Niterahany dimy ny vadiny, niterahany roa kosa ny vadikeliny. Andaniny, nampiadana ity farany sy ireo zanany izy. Ankilany, tsy niraharaha intsony azy eni-mianaka izy rehefa nandao ny tokantrano.
Vokany, nametraka fitoriana ny vady mariazy noho ny fijaliana nianjady taminy sy ny ankohonany. Nandeha ny fanamarinana nataon’ny vadintany sy ny zandary avy ao Andranomanelatra. Notratrarina tao an-tranony teny Androvakely, Antsirabe, ilay raim-pianakaviana sy ny vadikeliny. Noraisim-potsiny teo am-pisakafoanana izy roa, niaraka tamin’ny zanak’izy ireo. Nosamborina, natolotra ny fampanoavana ka naiditra am-ponja vonjimaika, miandry ny fotoam-pitsarana.
60 isan’andro
Maro amin’ny mpivady, na lahy na vavy, no miaritra fampirafesana. Betsaka koa anefa no tsy sahy mitoroka na misafidy ny fisaraham-panambadiana avy hatrany. Manamarina ity farany rahateo ny tatitra azo avy eny amin’ny Fitsarana ambaratonga voalohany eto Antananarivo, fa ampolony isan’andro ny mpangataka fisarahana eny an-toerana. Tamin’ny taona 2023 aza dia tafakatra 60 isan’andro ny mangataka hisara-bady. Ny fanambadiana aloha loatra miharo tsy fahamatorana no antony mahatonga izany. Manomboka amin’ny tanora vao misandratra hatrany amin’ny 65 taona ny salan-taonan’ny mpangataka fisarahana eny amin’ny tribonaly Anosy. Manomboka enim-bolana hatramin’ny am-polo taona maro vao mivoaka ny didy mahakasika ny fisaraham-panambadiana.
Tsiferana R.
French