Hotanterahina eto an-dRenivohitra sy any Toliara, rahampitso, ny lalao manasa-dalana miverin’ny fiadiana ny ho tompondakan’i Madagasikara, “Coca-Cola Pureplay Football League (PFL)”. Hifanandrina amin’izany ny 3FB Toliara sy ny Elgeco Plus Analamanga, lalao hatao ao amin’ny kianja Maître Kira Toliara. Ny Disciples FC Vakinankaratra kosa handray ny Zanakala FC, etsy amin’ny Elgeco Plus stadium, By-pass. Fantatra amin’io fotoana io ireo ekipa roa hiatrika ny lalao famaranan’ny «Coca-Cola PFL».
Tsiahivina fa manana tombony amin’ny isa iray avy, ny Elgeco Plus sy ny Zanakala FC amin’izao fotoana izao, ka ady sahala ihany dia efa ampy hahatafakatra azy ireo any amin’ny dingana farany. Ny mpilalaon’Analamanga nandresy ny 3FB Toliara, 1 no ho 0, ary ny Zanakala nandavo ny Disciples FC, 3 no ho 2. Mila mandresy amin’ny elanelan’isa roa, araka izany, ny Disciples FC sy ny 3FB vao mahazo ny tapakila ho any amin’ny famaranana.
F.R
French