TSELATRA

Tratra teo am-pangalarana takelaby mpanome herinaratra mipetaka amin’ireo andrin-jiro amoron-dalana eny Andohatapaneka ny jiolahy iray, ny faran’ny herinandro teo. Ireo polisy manao fisafoana amin’iny faritra iny no nahatratra azy nivimbina ireo takelaby ireo. Niaiky ny heloka vitany izy nandritra ny famotorana nataon’ny polisy.
Namoy ny ainy ny adala iray tao Efatsy Farafangana, afakomaly. Zandary teo am-panaovana ny asany no nodarohan’io adala io tamin’ny zaran’angady. Niaro tena anefa ilay zandary ka avotra soa aman-tsara. Nianjera tamin’ny tany ilay adala, tsy vitan’izay fa mbola nakapokapony tamin’ny rindrina ny lohany. Vokany, maty tsy tra-drano izy na efa nentina hopitaly aza.
Naratra mafy teo amin’ny lohany ny lehilahy iray voadonan’ny fiara teny By-Pass, ny sabotsy teo. Niampita lalana tampoka izy no notsenain’ny fiara 4×4. Nentina hopitaly avy hatrany izy ka avotra soa aman-tsara na teo aza ny ratra nahazo azy. Nandeha mafy ilay fiara saingy tsy hitan’ilay niharam-boina.