Maty voatifitry ny polisy i Bilo sy Karata mpaka an-keriny. Tra-tehaka niaraka tamin’izy ireo ny basy mahery vaika miisa enina. Nogiazana ihany koa ny ody ratsy fampiasan-dry zalahy.
Lavon’ny polisim-pirenena tao amin’ny fokontany Moratelo, kaominina Ambodirano, distrikan’Amparafaravola, ny 01 jolay teo ny mpaka an-keriny roa lahy. Tompon’antoka tamin’ny fakana raim-pianakaviana roa niambina vary teny an-tsaha, ny alin’ny 5 jona izy ireo. Namolavola paikady hanatrarana ny olon-dratsy ny tao amin’ny sampana miady amin’ny heloka bevava, ny sampandraharaha miady amin’ ny jiolahy mahery vaika, sy ny kaomisarian’Ambatondrazaka, ary ny polisin’Amparafaravola.
Nisy ny fitsongoana dia, fantratra taorian’izay ny toerana sy ny fieren’ireo dahalo. Nikasa handositra ireo mpaka an-keriny. Voatery nitifitra ny polisy. Lavo tamin’izany i Bilo sy i Karata. Nitohy ny fikarohana ny namany. Rava ny toby famaharan’ity andiana mpaka an-keriny ity. Hita nandritra izany ny fitaovam-piadiana mahery vaika miisa enina. Mbola hita tao an-toerana koa ny ody ratsy tao amin’ny kizon’ i Beparasy, kaominina Marotsipohy, distrikan’Anjozorobe.
Sambo-belona…
Tetsy ankilany, voasambotra i Zetra, atidoha nikotroka ny fakana an-keriny niseholany tao amin’ny distrikan’ Amparafavarola. Tratran’ny polisy tao Ambatondarazaka. Atao famotorana ao an-toerana izy, hatolotra ny fampanoavana aorian’izay. Mitohy ny fikarohana ireo mpiray tsikombakomba aminy.
Nanao valandresaka tetsy amin’ny Toby Razafindrazaka Berthin, nitatitra ny vokatra azon’izy ireo ny Minisitry ny Filaminam-bahoaka, ny Contrôleur Général de Police, Rakotoarimanana Herilala, omaly. Tsiahivina, nitsidika ny kaominina Morarano Chrome, distrikan’Amparafaravola, ireo solontena avy ao amin’ny Emmo/Nat, ny sabotsy 10 jona lasa teo. Nanome toromarika ny mpitandro filaminana miantsehatra an-kianja amin’ny hanamafisana ny ady amin’ny fakana an-keriny. Nahitam-bokany avy hatrany izany.
Tsiferana R.
French