« Ny valala tsy an-tanana tsy atolo-jaza”, hoy ny ohabolana malagasy manamafy ilay lamina voajanahary: “izay manana ihany no manome”! Manam-be tokoa ny Malagasy… Omeny sy aparitany eny amin’ny fiarahamonina izany!
Tanora malagasy, tsy manaja raiamandreny. Ny zaza malagasy tsy manaja mpampianatra, sns. Olona tsy manome hasina. Olona mpanivaiva… Ka izay ananany ihany ange no omeny e!
Matoa tsy afa-manolotra haja amam-boninahitra, tsy manana izy izay. Matoa sahy manivaiva sy tsy manome hasina, ireo no hananany amby ampy ka omeny ny mpiara-monina, mpampianatra, vahoaka, mpanabe, mpiara-miasa, mpifanolo-bodirindrina, sns.
Nanomboka nanary ny haja amam-boninahiny ny Malagasy ka nanjary tsy nanana matoa tsy afaka mizara izany intsony. Efa tsy manana fahendrena sy fahalalam-pomba ny raiamandreny sasany matoa tsy nanan-kampitaina tamin’ny taranany. Lasa ratsy taiza ny Malagasy sasany!
Ireo heverina fa faran’izay kely aza ny fanatanterahana azy, tsy ananan’ny Malagasy intsony. Zovy amin’ny ankizy ankehitriny, ohatra, no mahay milalao fanorona, katro, soamiditra, marakely, sns. Tsy haintsika ankehitriny intsony ny milalao ireny, satria, tsy nanana fahalalana momba azy ireo hampitaina ny raiamandreny teo aloha.
… Nampahantra tena ny Malagasy
Nanjary tsy nanan-komena amin’ny fahendrena, fanajana, fahalalam-pomba, sns, satria, nanary izany. Nisy ny teo an-tanana fa very sy nalevina. Lasa vakoka sy rakitry ny ela mahavariana ny aty aoriana sisa izy ireny fa tsy niainana intsony. Nanjary firenena poakaty i Madagasikara sy ny Malagasy. Mindrana ny an’ny firenen-kafa mba hamenoana ny banga. Tsy nijanona hatreo amin’ny findramana, anefa, fa mpanao indran-draikitra. Tsy mamerina.
Tena manam-be amin’ireny zava-nindramina ireny ny Malagasy, matoa poa toa izay, efa samy miborotsaka pataloha, mitondra kavina amin’ny sofina an’ila, mandoko volo, sns, ny tovolahy malagasy. Mampiseho tratra sy vatam-pe ny zazavavy. Manao tsinontsinona ny zokiolona ny tanora be diplaoma. Mihevitra ny vahoaka ho bado ny be fahefana.
Vahaolana, mila mizara izay mbola mahatsiaro fa manana fomba amam-pahendrena, kolontsaina, tahotra an’Andriamanitra, sns.
HaRy Razafindrakoto
French