Vaovao lehibe ho an’ny tontolon’ny soradihy. Handray anjara amin’ilay hetsika “South African Art Festival” i Gaby Saranouffi. Ny tantaran’ny mpanjakavavy Ranavalona III no hozarainy an-tsehatra mandritra izany.
Hotontosaina ny 8 hatramin’ny 10 aogositra izao ilay hetsika ara-javakanto “South African Woman Art Festival”, any Durban, Afrika Atsimo. Anisan’ireo voasafidy haneho ny talentany mandritra izany ilay mpandihy sy mpamorona soradihy, Gaby Saranouffi. Fotoana izay hitondrany an-tsehatra ny “Ranavalona III, The Chrisalys Queen” indray izany. Araka ny lohateniny, maneho ny tantaran’ny mpanjakavavy farany teto Madagasikara ity soradihin’i Gaby Saranouffi ity. Izy irery rahateo no haneho izany. Miara-miasa amina mpanakanto afrikanina tatsimo kosa izy, eo amin’ny mozika ravaka, ny akanjo fisehatra, sns.
Tsy vao sambany no hitondran’i Gaby Saranouffi an-tsehatra ny “South African Woman Art Festival”. Be mpankafy izany, noho izay maneho tantara izay. Manintona ihany koa ny nisafidianana ny fitafy sy ny fisehatra anatin’ny soradihy.
Hetsika iray fanao isan-taona any Afrika Atsimo ny “South African Woman Art Festival”. Vehivavy mpanakanto afrikanina tatsimo maro, miampy ireo solontena avy amina firenen-kafa no mizara ny kantony mandritra izany. Kanto marolafy no aseho mandritra ny telo andro. Noho i Gaby Saranouffi efa monina any Afrika Atsimo, mora aminy kokoa ny mifandray sy miara-miasa amin’ireo mpanakanto namany, izay nanampy azy amin’ny fanatontosana ity soradihy miavaka ity.
Zo ny Aina
French