Latsaky ny 25 taona avokoa ny 64% ny Malagasy. Tombony izany eo amin’ny sehatry ny toekarena sy ny fampiasam-bola. Ho an’i Madagasikara, manodidina ny 37,9% ny tahan’ny fananan’asa ka lehilahy avokoa ny ankamaroany. Mahay mamorona sy manan-talenta ny tanora malagasy. Betsaka ireo mandraharaha noho ny tsy fahitana asa saingy sakana ny fitadiavana mpamatsy vola enti-mampiroborobo ny seha-pihariana. Noho izany, mila tohana sy fampiofanana ny tanora hoenti-mamokatra sy hampitomboina ny fahaiza-manaony. Voaresaka izany nandritra ny fankalazana ny andro maneran-tany ho an’ ny fahaiza-manaon’ny tanora, andiany faharoa tao amin’ny faritra Boeny ny 15 sy 16 jolay teo. Lohahevitra tamin’ity taona ity ny hoe « manangana ho an’ny tontolon’ny asa, mitovy sy mampiaty indrindra ho an’ny tanora eny ambanivohitra, miantoka ny filaminana, maha olom-pirenena sy fampandrosoana lovainjafy ». Nivoitra tao anatin’izay fa fototra lehibe ny fanovana ny fampianarana sy ny fampiofanana arakasa mba hananan’ny tanora asa mendrika sy mamaly ny filan’ny asa.
Fanampiana
Andry telo lehibe ny fitondram-panjakana ny loharanon-karena mifototra amin’ny olona, ny fampiroboroboana ny indostria sy ny fanodinana ara-toekarena ary ny fahaiza-mitantana. Ilaina ny fifanomezan-tanana sy ny fanohanana hanampiana ny tanora malagasy. « Asa tohivakana ny fampiofanana sy fampanan’asa mendrika… », hoy ny minisitry ny Fambolena sy ny Fiompiana, Ratohiarijaona Suzelin. Nampahafantariny ihany koa ireo politika hiatrehana ny fampiroboroana ny tanora, ny famoronan’asa sy ny fanomezana asa mendrika ho an’ny tanora eny ambanivohitra.
Henintsoa Hani
French