Misy ny bokikely hamantarana ny isa sy ny karazan’entana azon’ny mpandeha entina miditra eny amin’ny seranam-piaramanidina. Azo ampiasaina koa ny finday avo lenta hidirana ao amin’ny fitaovana niomerika eTariff.
Natao, omaly, ny fivoriana nokarakarain’ny Fitantanana foibe ny haban-tseranana (DGD) malagasy, niaraka tamin’ireo mpisehatra sy manan-draharaha aminy. Nifantoka tamin’ny Fifanarahana hanamorana ny fifanakalozana ara-barotra (AFE), araka ny tanjon’ny Fikambanana iraisam-pirenena ara-barotra (OMC). Nandray anjara tao ny vondron’ny mpandraharaha tsy miankina, ny mpikarakara ny fanafarana na ny fanondranan’entana any ivelany, sns.
Nampahafantarin’ny tale jeneraly (DG), Zafivanona Lainkana, ny fepetra mihatra eny amin’ny haban-tseranana. Voafaritra ao ny sokajin’entana ary ny fatra sy ny isa azon’ ny mpanjifa entina miditra aty Madagasikara. Toy ny zava-pisotro misy alikaola, ny sigara, ny kojakoja (ranomanitra, finday, entana sarobidy, sns), ho ampiasaina samirery fa tsy amidy. Tsy mihoatra ny 1 000 euros ny vidin’ny entana rehetra tsy andoavana haba. Tsy maintsy anaovana fanambarana amin’ny ladoany kosa ny entana mihoatra amin’ny fetr’ isa, ka andoavana haba.
Tsy azo sokafana
Fomba vaovao koa ny fampiasana ny teknolojia niomerika, antsoina hoe: “eTariff”. Azo jerena anaty finday avo lenta (android na Iphone) ny momba ny entana rehetra, ny dingana arahina ary ny saran’ ny haban-tseranana tokony haloa.
Mahakasika ny fitarainana samihafa eny amin’ny seranam-piaramanidina, nilaza ny DG Zafivanona Lainkana, fa « tsy afaka manokatra ny valizin’ny mpandeha ny mpiasan’ny ladoany, raha tsy eo imason’ny tompony ». Nohamafisiny fa mila manao fanambarana amin’ny ladoany ny mpandeha ny entana mihoatra amin’izay noferan’ny lalàna. « Misy foana ihany koa ny fivoriana tarihin’ny ACM, iarahan’ ny mpisehatra rehetra eny amin’ny seranam-piaramanidina, toy ny ladoany, ny polisin’ny sisin-tany Paf, ny sampandraharaham-panjakana hafa », hoy ihany izy.
Njaka Andriantefiarinesy
French