“Olobe eto amin’ny tany sy ny fanjakana ny minisitra. Ao anatin’ny fahefana mpanatanteraka izany. Mitodika aminy ny mason’ny rehetra. Miandry azy hiasa mafy ny olona, miandry azy hijery ny fiainany… “. Izay ny fijerin’ny mpandinika fiarahamonina izay filoha lefitry ny Conseil du fampihavanana malagasy (CFM) teo aloha, Ramamimampionona Gérard, momba ny fanendrena minisitra amin’ny fananganana governemanta vaovao, amin’izao fe-potoam-piasana vaovao izao. Koa ny fitondran-tenan’ny minisitra amin’izany dia mifanaraka amin’izay soatoavina malagasy hoe olona ananana fahatokisana amin’ ny zavatra rehetra: rehefa miteny, mahaentana ny olona; ankasitrahan’ny olona… Nefa misy lasa toy ny misavoamboana, lasa any amin’ny filan-karena, any amin’ny fanamboamboarana fehitenda sy vozon’akanjo. Tsy vonona hamoritra tanan’akanjo izany. Tsy mahagaga raha mivaona any amin’ny zavatra hafa ny fitondran-tena, araka ny nambarany. Raiamandreny ihany koa ny minisitra, na mpiasa aza. Koa mila fitondran-tena alain-tahaka ho an’ny besinimaro, mendrika, mihaja, madio, ary atokisan’ ny olona tanteraka. Notsiahiviny koa fa tsy tokony hanalavitra ny filana fototra amin’ny vahoaka sy izay tena andrasan’ny vahoaka izay atao amin’ ny politika. Hevitra iray atao lamina hitondra asa hiara-manatanteraka ho amin’ny fampandrosoana sy ny filaminan’ny tanàna ny politika.
R. Nd.
French