Fotoana mampirongatra ny karazan’aretina ny ririnina. Maro ireo torohevitra ho fiarovan-tena hiatrehana izany sy hananana hery fiarovana matanjaka.
Manoloana ny ririnina mamirifiry, manome torohevitra hiatrehana ny hatsiaka ny CHUJRA ao amin’ny pejiny hananana fahasalamana tomombana.
Fotoana mahabe ny aretina ny hatsiaka. Mora miparitaka ny gripa sy sery, covid-19 sy ny aretin-tenda, ny aretim-pivalanana…
Azo atao anefa ny misoroka azy ireo amin’ny fampitomboana ny hery fiarovana anaty vatana. Anisan’ny zava-dehibe ny fifantenana ny sakafo hohanina. Sakafo mafana ara-pahasalamana no tena tsara indrindra. Anisan’izany ny legioma isan-karazany sy voankazo maroloko izay ahitana vitamina A sy C ary Magnésium.
Ohatra amin’ireo ny voatavo, karaoty, tongolomaitso, persil, sesame, ananambo. Toraka izany koa ny papay sy ny karazam-boasary rehetra, ny mananasy. Tsy hadino ny vokatra azo avy amin’ny ronono, toy ny fromazy, ny dibera…
Rano mafana no tokony hosotroina matetika. Mety indrindra koa ny dite sakamalaho asiana tantely sy voasary makirana kely.
Tokony hotohizana hatrany ny fanaovana fanatanjahantena na dia mangatsiaka aza ny andro. Fomba iray ahafahana mampiakatra ny hery fiarovana koa ny fampiasam-batana. Tsy tokony hanao reraka be anefa fa na dia an-tongotra ihany aza mandritra ny 30 mn isan’andro dia ampy.
Tena zava-dehibe ny fahampiana torimaso izay miantoka ny ampahany betsaka amin’ny fahasalamana. Matory mandritra ny adin’ny 8 raha kely indrindra.
Miaro vatana hatrany amin’ ny hatsiaka. Ilaina hatrany ny mivatsy akanjo mafana satria mivadibadika ny andro.
Ankoatra ireo, hajaina hatrany ny fepetra sakana rehetra. Manasa tanana matetika amin’ny savony, manao arovava orona raha misy soritraretina, tampenana amin’ny kihon-tanana ny orona sy ny vava rehefa mievona…
Tatiana A
French