Lehilahy natao takalonaina : mitaky 8 tapitrisa Ar ireo mpaka an-keriny

Lehilahy 31 taona anisan’ny kartie mobile indray no lasan’ny dahalo tao amin’ny distrikan’Anjozorobe, omaly. Mitaky vola an-tapitrisany ireo mpaka an-keriny.

Mitaky vola valo tapitrisa Ar amin’ny fianakavian’ny lasibatra ireo olon-dratsy naka an-keriny lehilahy iray 31 taona tao amin’ny tanànan’Ankidondona, fokontany Andranonkotona, distrikan’ Anjozorobe, afakomaly. Niton­dra olona teny anivon’ny biraon’ ny zandarimaria io noho ny fisian’ny olana tamin’ny resaka hazo io lehilahy io. Natao fa­motorana izy nandritra izany fotoana izany. Nampodian’ny mpitandro filaminana kosa izy ny tolakandro. Tonga tany amin’ny trano fonenany, naharay antso tsy ankijanona izy mba hiverenany mihazo an’ Anjozo­robe. Tsy niandry ela, nanainga nihazo an’io toerana voatondro io avy hatrany ilay raim-pianakaviana izay anisan’ ny andrimasom-pokonolona ao an-tanànany. Tsy hitan’ny fianakaviany intsony izy na­nomboka tamin’io fotoana io sady tsy tafaverina tao amin’ ny trano fonenany.

Mitaky vola an-tapitrisany
Niseholany ny hafatra miafina avy amin’ny olon-dratsy ho an’ny fianakavian’ny lasibatra ny harivan’io alarobia 17 jolay io. Mitaky lelavola 8 tapitrisa Ar ho takalon’ny ain’ ilay raim-pianakaviana andrimasom-pokonolona nalaina an-keriny ireo naka takalo­naina. Nampitandrina ny havan’io lehilahy io ireo da­halo fa hotaperiny ny ain’io olona io raha toa ka tsy ma­nome ny vola takina aminy ny fianakaviany. Tsy mety foana ny fakana an-keriny ao amin’ io distrika io izay miseho ma­te­tika. Efa namoizana ain’ olona mihitsy izany na teo aza ny fidinana ifotony nataon’ny manam-pahefana hamongorana ireo mpaka an-keriny. Andrasana ny tohin’ny raha­raha.

Tsiferana R.