Natolotra ny fampanoavana omaly ka naiditra am-ponja indray i Rasta, jiolahy raindahiny amin’ny halatra fiara. Nisy nangalatra ny alahady 14 jolay lasa teo ny fiara taxi R.11 teny Ambohimangakely ka nifampitadiavana. Nivoaka nandeha nisakafo ny mpamily tamin’io fotoana io. Hatairana anefa ny azy nony avy nisakafo fa tsy teo amin’ny toerana nipetrahany intsony ny fiarany. Nilaza io mpamily io fa nisy vola 3 hetsy Ar tao anatin’ny fiarany. Nanao fikarohana avy hatrany ny zandary notarihin’ny kaomandin’ny tobim-paritra Ambohimangakely. Nahitam-bokany izany satria ny 16 jolay, nahatsikaritra lehilahy Rasta iray nitondra fiara. Voasambotry ny zandary teo am-pivarotana jante aluminium Rasta, monina ao Tsaraloha, fokontany Ambohitrandriana Ambohimalaza. Nandritra ny famotorana azy no nahafantarana fa nafeniny tao an-tampon-kavoana ny fiara nangalariny. Niroso tamin’ny fitsirihana sy fisavana ny toerana nanafenany izany ny zandary. Mbola nahitana fiara hafa R.4 roa ihany koa niaraka tamin’io fiara taxi io. Ny iray efa ny carrosserie sisa tavela. Ny iray kosa novaina piesy sy andalam-pikikisana loko. Nahitana fanamiana mpitandro filaminana tao anaty fiara izay nolazainy fa sady fatoriany ihany koa. Nogiazana ireo fiara roa halatra ireo. Naverina amin’ny tompony ilay fiara taxi. Nogiazana ny motera iray miaraka amin’ireo kojakoja samihafa hany sisa tavela an’ilay R4.
J.C
French