Sady mahavariana no mahalasa saina ny mahita “score” tataka be aty amin’ny fifaninanam-pirenena taranja rugby XXL Top 12. Tsy mitovy mihitsy mantsy ny tanjaky ny ekipa mifaninanana fa ahitana elanelana be. Tsy miady mihitsy fa lasa mandeha ila toy ny kavin’ny tovolahy, araka ny fiteny ankehitriny, ny zava-misy eny an-kianja. Nanamarina izany ny vokatra teo amin’ny andro fahefatra, notanterahina omaly, tetsy amin’ny kianja Makis Andohatapenaka. Nivoaka ho mpandresy avokoa mantsy ireo ekipa goavana. Anisan’izany ny nandavoan’ny Uscar ny FTBA tamin’ny isa 67 no ho 20.
Anisan’ny nahazendana ny maro ny namontsanan’ny FTM Manjakaray ny USA Ankadifotsy tamin’ny isa mavesatra 80 no ho 8. Tsy nanohitra mihitsy Ankady fa nanaovan’ny mpilalaon’i Manjakaray fampisehoana isan-karazany, tamin’ny alalan’ny baolina nentin-tanana.
Tsy namaly ny hetahetan’ny mpijery ihany koa ny fihaonan’ny TFMA sy ny Cosfa. Lavon’ny bebaoty tamin’ny isa, 23 no ho 21 mantsy ny boaikely manohitra.
Tompondaka
French