Tsy nifankandrenesana ny poa-basy teny Ankadikely Ilafy. Lavon’ny balan’ny Fip ny jiolahy telo lahy nitam-piadiana, afakomaly.
Ravan’ny polisin’ny Fip ny andian-jiolahy nikasa hanao fanafihana mitam-piadiana teny amin’ny fokontany Ambohibe, kaominina Ankadikely Ilafy, afakomaly. Nanomana paikady, nitetika hanao ny asa ratsy mahazatra azy ireo mpandroba ireo. Naharay loharanom-baovao hatry ny ela anefa ny mpitandro filaminana ka niandry kendry tohina ireo olon-dratsy. Nifampitaona teny Ambohibe, araka izany, ireo jiolahy ary nikasa hanatanteraka ny fandrobana. Nanao vela-pandrika ny polisy ka raikitra ny sakoroka. Vokany, lavo ny telo lahy tamin’ireo jiolahy. Tafaporitsaka ny namany iray. Nahatrarana fitaovam-piadiana toy ny basy miisa roa niampy bala teny amin’ izy telo lahy maty voatifitra ireo. Tsy vaovao amin’ny polisy intsony, efa mpangalatra mitam-piadiana teto an-dRenivohitra sy ny manodidina hatry ny ela ny roa tamin’ireo lavo.
Karohina ny namany
Mitohy ny hazalambo ataon’ ny mpitandro filaminana ny jiolahy mpiray tsikombakomba amin’ireo telo voatifitra ireto. Namaly tifitra ny polisy hisambotra azy ireo efa-dahy ka afa-nandositra tamin’io fotoana io ilay jiolahy namany. Tsiahivina, maty voatifitra ny mpitandro filaminana teny amin’ny fokontany Ambohibe, kaominina Ankadikely Ilafy ny jiolahy telo lahy, ny faran’ny volana febroary teo. Nikasa haka an-keriny teratany vahiny teny an-toerana izy ireo. Ankoatra io, mpamaky trano roa lahy koa lavon’ny tifitry ny zandary tsy lavitr’io fokontany io, tao Manazary, ny volana janoary.
Tsiferana R.
French