Manga ny lanitra eo amin’ny fiaraha-miasan’ny firenena malagasy sy ny Firenena mikambana. Nanamafy ny hitohizan’izany ny roa tonta nandritra ny fihaonana, omaly, teny Iavoloha.
Tontosa, omaly, teny amin’ny Lapam-panjakana Iavoloha, ny fihaonana teo amin’ny mpandrindra maharitry ny Firenena mikambana eto Madagasikara, Issa Sanogo, sy ny filohan’ny Repoblika, Rajoelina Andry. Ankoatra ny fanaovam-beloma an’ity mpandrindra maharitry ny Firenena mikambana ity ny filoha, nisy ihany koa ny jery todiky ny asa niarahan’ny firenena malagasy sy ny sampandraharahan’ny Firenena mikambana natao. Nisaotra sy nankasitra ity Vondrona iraisam-pirenena ity ny filoha Rajoelina Andry, tamin’ny fanohanana ireo asa fampandrosoana natao teto Madagasikara ary nanamafy hatrany ny fahavononan’i Madagasikara hiara-hiasa.
Sehatra maro no niarahan’ny roa tonta niasa, nandritra izay fe-potoana niasan’i Issa Sanogo teto Madagasikara izay. Anisan’ny nisongadina tamin’izany ny fahatanterahan’ny fifidianana samihafa teto Madagasikara. Izy ireo izay anisan’ny nanambara ny fahafaham-pony nandritra ireny fifidianana ireny. Ankoatra izay, anisan’ny niseharan’ity vondrona iraisam-pirenena ity teto Madagasikara ihany koa ny mahakasika ny ady amin’ ny tsy fanjarin-tsakafo, ny ady amin’ny fiovaovan’ny toetr’andro ary ny ady tamin’ny valanaretina Covid-19. Rantsa-mangaikan’ny Firenena mikambana miisa telo ihany koa no nanatanteraka ny fandaharanasany tao anatin’izay fe-potoam-piasany izay, dia ny Pnud sy ny Unicef ary ny UNFPA . Tanjona tamin’izany ny fanatsarana ny fari-piainan’ny Malagasy.
Voatendry hiasa any Cameroun indray i Issa Sanogo, rehefa niasa nandritra ny 4 taona teto Madagasikara. Raha tsiahivina, ny taona 2020 izy no notendren’i Antonio Guterres, Sekretera jeneralin’ny Firenena mikambana, ho mpandrindra maharitra an’ity vondrona iraisam-pirenena ity eto Madagasikara.
Lin
French