Fifidianana kaominaly: nahemotry ny Ceni amin’ny 11 desambra ny daty

“Mifantoka ao anatin’ny tontolon’ny fifidianana ben’ny Tanàna sy mpanolotsain’ny Ta­nàna ny resaky ny mpisehatra politika. Nisy ny ny volavolan-kevitra naroson’ny Ceni ny governemanta ny amin’ny tokony hanatanterahana izany amin’ny 6 novambra”. Io ny fanazavan’ny mpampakate­nin’ny Ceni, Andriamarotafika Soava, teny Alarobia, omaly, momba ny fanatanterahana fifidianana kaominaly.
Nisy ny taratasy nampi­tain’ny Praiminisitra tany amin’ ny Ceni ny amin’ny hoe misy antony teknika vitsivitsy ny tsy fahazoana manatanteraka izay fifidianana izay amin’ny 6 novambra. Anisan’izany ny tsy mbola mahatafatsangana ny governemanta amin’izao. Tokony hanome volavolan-kevitra vaovao ny amin’izay tetiandro hanaovana izany ny Ceni, izay rehefa nandinika sy namakafaka dia nahita fa amin’­ny 11 desambra no mety hanaovana izany. Izay no naroson’ny Ceni ny governemanta.
Na izany aza, tsy maintsy maka ny hevitry ny Filankevi-panjakana amin’ny maha fitsarana mahefa amin’ny raharaham-pifidianana eny anivon’ ny Faritra azy ny Ceni. Voa­faritry ny lalàna fa amin’ny vanim-potoan’ny maintany no tokony hanaovana fifidianana. Tsy ao anatin’izay ny farany volana novambra hatramin’ny faran’ny volana avrily ny taona manaraka. Noho izany, tsy maintsy alaina ny hevitry ny fitsarana hahazoana mifantoka amin’izay fanatanterahana izay fifidianana izay. Raha mahazo fankatoavan’ny go­vernemanta sy ny Filankevi-panjakana izay volavolan-kevitra izay, mivoaka ny didim-panjakana manaika ny mifidy amin’izay fifidianana amin’ny 11 desambra izay.

R. Nd.