Manjakaray : Vaky ny fitaratra, fiara iray nisy nitifitra

Nieren-doza ireo vehivavy nandeha tamina fiara iray nisy nitifitra teny Manjakaray, ny sabotsy maraina tamin’ny valo ora. Nahitana diam-bala teo amin’ny fitaratraben’ny fiara…

Nihorohoro indray ny mponina teny Manjaka­ray sy ny manodidina, ny sabotsy maraina teo. Nian­tefan’ny bala teo amin’ny fitaratraben’ny fiara nentin’ny renim-pianakaviana iray nia­raka tamin’ireo vehivavy roa namany. Araka ny fanazavan’ ity renim-pianakaviana ity, nan­deha fiara izy sy ireo namany, tamin’io fotoana io. Nony efa tonga teo amin’ny fiantsonan’ny taxi-be, 25, Manjaka­ray Ambodivona, nisy moto nivilavila fandeha ka nifaoka ny fitaratra amin’ny sisin’ny fiara. Nandritra izany anefa no nisian’ny poa-basy tany amin’ ilay mpitondra moto ka nipitika teny amin’ny fitaratry ny fiara ny bala. Niaraka tamin’ny fofon-javatra manempotra izany. Vory lanona vetivety ny olona teo amin’ny manodidina nandre izany fipoahana mafy izany. Tao anatin’izany no nahitana ireo moto roa nirifatra nandeha mafy nihazo an’i Manjaka­ray. Matetika ahitana trangana tsy fandriampahalemana iny faritra Ambodivona hatrany Man­ja­karay iny. Ilay renim-piakaviana no saika nokendren’ireo jiolahy hotifirina saingy nieren-doza izy? Tsy mbola fantatra mazava na fikasan-jiolahy hanao fanafihana na inona ny antony. Andrasana, araka izany, ny tohin’ny fanadihadiana ataon’ny mpitandro filaminana.

J.C