Ramatoabe iray handeha hiantsena vao maraina no maty voadonan’ny fiara teny Ampasampito, ny sabotsy maraina teo. Tafatsofoka tao ambany fiara izy ka tsy mba nialana nenina akory. Handeha hiantsena vao maraina izy no tra-doza. Araka ny fitantaran’ireo olona nanatri-maso, nandeha mafy ilay tovolahy teo ambony familiana ka tsy nahafehy lalana intsony. Teny amin’ny sisin-dalana ity renim-pianakaviana ity no voafaokany. « Mafy ny dona nahazo ilay ramatoa satria efa lavidavitra mihitsy vao tafajanona ny fiara », hoy ny fanazavan’ny raim-pianakaviana iray. Nikasa hitsoaka ilay mpamily saingy tsy afaka intsony satria taraiky tao ambany fiara ilay niharam-boina.
Toy ny fanaony, miantsena vao maraina maka entana any Andravoahangy ity renim-pianakaviana niharam-boina ity. «Fanaony ny mandeha an-tongotra vao maraina isaky ny miantsena toy izao », raha ny filazan’ireo mpiara-monina aminy.
Fiara iray hafa koa nitrongy fiara roa nijanona teo amoron-dalana amin’ny fiantsonan’ny taksiborosy eo Ampasampito, afakomaly ihany. Lasa nitsoaka ny mpamily. Nahitana fahasimbana ireo fiara notrongisiny.
J.C
French