Ao anatin’ny vanim-potoanan’ny fialantsasatra ny ankizy amin’izao fotoana izao. Ho an’ny sekolin’ny baolina kitra, Analakely Football Academy, Afa, maro ny fifaninanana miandry azy ireo. Ho an’ny zazalahy U13, handray anjara amin’ny « Orange Challenge », fifanintsanana izay karakarain’ny Orange sy ny Union des clubs et écoles de Foot (Ucef), any Mahajanga, manomboka ny 19 hatramin’ny 25 aogositra ho avy izao, izy ireo. Araka ny filazan’ ny mpanazatra, Manitriniaina Steve Princy, hanainga ny 17 aogositra ho avy izao, eto Antananarivo, ny Afa. Ankoatra izay, eo am-piandrasana ny lalao manasa-dalana amin’ny « Orange Challenge U9 », izay hatao eny Ambatolampy Tsimahafotsy, amin’izao fotoana izao, ny mpilalaon’izy ireo U9. Tsara marihina fa manana klioba vehivavy, solontenan’ny ligin’Itasy amin’ny fifaninanana nasionaly, diviziona voalohany, ny Afa. Efa eo am-panomanana izany fifaninanam-pirenena izany ry zareo, ankehitriny. Niatrika lalao ara-pirahalahiana tamin’ny Ajesaia ny Afa, sokajy vehivavy, ka nandresy azy ireo 1 no ho 0, teny Taninkatsaka Itaosy, ny alahady lasa teo. Ampahatsiahivina ihany fa tsy mbola navoakan’ny Federasiona malagasin’ ny baolina kitra (FMF) ny daty sy ny toerana hanaovana ny D1 nasionaly sokajy vehivavy.
Mankalaza ny faharoa taona
Ao anatin’ny fankalazana ny faharoa taona nitsanganan’ny kianja artifisialy Analakely Stadium ankehitriny, ny fikambanana PK. Tao anatin’izay fotoana izay, nanangana ny PK Store izy ireo. Tranombarotra ara-panatanjahantena iray izy ity, ary ahitana ny fanamiana, toy ny “maillot”, “short”, “godasse…”, izany. Misy ny lalao izay karakarain’izy ireo, ka hotolorana fanomezana maro sy fahafahana milalao eo amin’ny kianja maimaimpoana izay mandresy
amin’izany.
Fitia Randria
French