Namatrapatratra avokoa ireo depiote avy amin’ny Tim, manoloana ny olana sosialy. Anisan’izany i “Del kely”, raha niresaka ny momba ny Jirama. “Aoka tsy hatao tahaka izao ny vahoaka. Aotra ny tolotra. Potika avokoa ireo fitaovana any an-tokantrano ary simba ny fihariana nefa mbola hosaziana indray koa ny vahoaka… Tena hita taratra ny tsy fahaiza-mitantan’ny mpitondra”, hoy izy tao amin’ny fandaharana “Miara-manonja”, omaly. Nohitsiny fa tokony hoesorina amin’ny toerany io tale jeneraly, teratany israelianina io. Hanafohy ny fitondrana Rajoelina ny mbola ijanonany amin’ny fitantanana io orinasa io, araka ny nambarany. “Mbola endri-panjanahana amin’ny endriny vaovao izao ka tokony hampihetsika ny vahoaka”, hoy ihany izy.
Nanamafy izany ny depiote Tim, voafidy tetsy amin’ny boriborintany fahadimy, Ralambozafimbololona Fetra, ka nilaza fa tena famotehana ny vahoaka sy fanaovana tsinontsinona izao olan’ny Jirama izao. Tratry ny tian-kano, tsy tian-kano ary koa ny jadona ny mpanjifa. Manampy trotraka izany ny tsy fananan’ny mpitondra vina hitsinjovana lavitra manoloana ny fitomboan’isan’ny mponina sy ny fotodrafitrasa efa tranainy. “Mikaikaika ny vahoaka manoloana izao tsy fahaiza-mitantana izao. Tsy afa-bela amin’ny delestazy intelo isan’andro ny eny aminay”, hoy ihany izy.
Tsiahivina fa nandrangaranga sazy ho an’ireo tsy mahaloa faktiora anaty fe-potoana efa voafaritra ny Jirama. Eo koa ny fampiakarana ho 5% ny faktiora amin’ny volana manaraka na koa fanapahana sy fanesorana ny kaontera mihitsy aza.
Synèse R.
French