Raha vao miteny hoe : «S» amin’izao andro iainantsika izao dia vola avy hatrany ny ao an-doha. Saosy no hiantsoana azy io. Tsy ilay tsiro ao anaty vilany akory ny tian-kambara fa drala na vola. Ahoana tokoa no handavana «S» raha misy. Ny «S» mantsy no maha rangahy, hoy ny Ntaolo. Iza tokoa ary no tsy ho tia «S», raha tsy ny adala ihany angamba saingy amin’ izao izy ireo aza, efa mitady «S».
Eto kosa hitandremana mafy ny «S». Tandremo fa raha vao misy «S», tsy raisina mihitsy fa mety hampidi-kizo. Saro-takarina tokoa ny tian-kambara raha tsy mamakafaka lalina. Tsotra anefa ny valiny. Ny t«S»olotra no tiana holazaina sy ambara aminareo mpamaky rehetra. Niteraka resabe mihitsy ny fifantenana mpilalao ho ao anaty ekipam-pirenena eto Madagasikara. Nisy ny fanolorana «S» ho an’ireo manan-katao na ireo be paosy ka na tsy mitondra vokatra tsara aza, raisina ihany satria misy «S».
Resin’ity «S» ity avokoa mantsy na ny mpitantana na ny mpanazatra na ny mpitsara. Nahonena ny nandre ny zava-misy teo amin’ny taranja lomano. Tsy voatery ho vola na saosy ihany ny «S» fa mety ho fijerena akamakama sy havana aman-tsakaiza ihany koa.
Aleo rehefa tsy misy «S» vao raisina. Tolotra indray no tian-kotenenina eto. Tsy misy «S» ao anatin’io teny io. Midika izany fa mazava, madio ary mangarahara rehefa tolotra tsy misy «S» no atao amin’ny zava-drehetra.
Ndao ary hifanome tanana, ka hanome zavatra tsy misy «S», mba hampadio ny lalao. Ny tranom-pody nefa no vitan’ ny vava ary ny tranon-kala no vita amin’ny kofehy fa ndao hankamamiana sy hotanterahina ilay tenin’Imboasalama hoe: «Tsy adidiko izaho samirery fa adidiko izaho sy ianao», ka tsy horaisina raha misy «S».
Tompondaka
French