Taratry ny fahaizan’ny Malagasy ny tontolon’ny horonantsary izao maha voafantina hiatrika hetsika iraisam-pirenena izao. Ity sehatra ity izay mitranga hatrany noho ny fampiroboroboana azy, tontosaina eto an-toerana.
Anisan’ireo horonantsary fanadihadiana, handray anjara amin’ny « Festival de la Cinéma de Madrid », andiany faha-33, hatao any Madrid Espagne, ny 12 hatramin’ny 20 septambra 2024, ny « Fanantenana: Musique pour l’espoir ». Ao amin’ny sokajy « Long métrage », mihoatra ny 60 minitra no misy azy, Ny 19 septambra 2024 ity horonantsary fanadihadiana ity no handeha, ao amin’ny efirano fijerena sarimihetsika Berlanga, Madrid. Ny votoatin’ity horonantsary fanadihadiana ity, izay manasongadina ny maha izy ny mozika no anisan’ny nahavoafantina azy amin’izao hetsika lehibe izao.
Horonantsary fanadihadiana maneho ny zava-misy sy ny iainan’ny ankizy eto Madagasikara ny « Fanantenana : Musique pout l’espoir ». Ao anatin’izany ihany koa no anasongadinana ny maha izy ny fanabeazana sy fitaizana amin’ny alalan’ny zavakanto, indrindra ny mozika. Ny Fondation Agua de Coco no namokatra sy nanatontosa azy.
I Jairo Zayala (Depedro) sy Kilema Randrianatoandro (Y Kilema) kosa no mpandray anjara fototra ao anatiny. Ankoatra ny fandraisana anjara amin’ny « Festival de la Cinéma de Madrid », hisy ihany koa ny hetsika ara-javakanto hataon’i Depedro sy Y Kilema, ao Madrid sy Granada ary Valencia, ny volana oktobra sy novambra ho avy izao.
Hetsika eo amin’ny tontolon’ny sarimihetsika anisan’ny sangany ao Espagne, ny « Festival de la Cinéma de Madrid ». Ny taona 1991 no niatombohany. Ankoatra ny fanasongadinana ny tontolon’ ny horonantsary ao Espagne, fototra nijoroany ny fanomezana sehatra ireo horonantsary isan-karazany vao misandratra. Amin’ity andiany faha-33 ity, horonantsary miisa 80, mizara sokajy dimy, no hifaninana handrombaka ny amboara, isaky ny sokajiny avy.
Lin
French