Natolotra ny fampanoavana, omaly, notanana vonjimaika any am-ponja avokoa ireo efa-dahy nanolana sady nandroba mpandraharaha iray sy ny zanany. Tratra teny Ankadikely Ilafy sy 67 Ha ireo olon-dratsy.
Vaosambotry ny polisim-pirenena avy eo amin’ ny sampana heloka bevava sakelika voalohany (BC1), ny olon-dratsy efatra mirahalahy, tompon’antoka tamin’ny fanolanana niaro fandrobana, ny 10 aogositra teo. Naharay fampahafantarana ny mpitandro filaminana fa tsy hita ny renim-pianakaviana iray sy ny zanany nanomboka ny 7 aogositra teo. Mivelona amin’ny asa fandraharahana io ramatoa io izay nanangom-bokatra tany Farafangana. Nifanao fotoana tamin’ny olona tao anatin’ny tambajotran-tserasera izy fa hisy hividy ny kafe milanja 6 taonina. Ireo efa-dahy no voalaza haka io entana io. Nifanao fotoana momba ny fifanaraham-barotra teny Ikianja, kaominina Ambohimangakely, izy ireo. Tsy hita intsony io ramatoa io sy ny zanany taorian’ izay. Nifampitadiavan’ny fianakaviany izy mianaka.
Nopoizinina
Nikaroka ny polisy. Fantatra avokoa ny toerana nisy ireo olona voasaringotra. Natao ny vela-pandrika ka voasambotra teny Ankadikely Ilafy sy teny amin’ny faritry 67 Ha ireo efa-dahy. Nomen’ireto farany poizina tamin’ny alalan’ny sakafo ilay ramatoa. Nanamparan’izy ireo ny filan-dratsiny io renim-pianakaviana io sy ny zanany. Voaroba avokoa ny kafe sy ny finday roa taorian’izay, araka ny fanadihadiana nataon’ny mpitandro filaminana. Lafon’ ireo tsy valahara 55 tapitrisa Ar teny amin’ny tsenan’Andravoahangy sy Andohatapenaka ny kafe rehetra.
Tsiferana R.
French