Manodidina ny 3 ka hatramin’ny 5 t/ha ny vary manitra miakatra ao Antsiranana II. Mahatratra hatrany amin’ny 250 taonina isan-taona kosa ny vokatra ho an’ireo mpikambana ao amin’ny koaperativa Vary manitra Diego II. Manomboka mahasarika ny Malagasy ity karazam-bary ity raha toa ka ireo teratany vahiny sy ny trano fisakafoana lehibe no tena manjifa izany teo aloha. Nahatratra hatrany amin’ny 5 taonina ny vokatra nentin’ireo kaoperativa teto an-drenivohitra, nandritra ny Tsenabe iraisam-pirenena ara-toekarena eny ambanivohitra (Fier-Mada) raha toa 1 taonina monja izany tamin’ny taon-dasa. Miavaka, hoy izy ireo, ny vary manitra vokarina ao Antsiranana II, mbola hita ao aminy ny singa maha vary manitra azy, eo koa ny hatsaran’ny voam-bary sy ny fofony.
Miteraka asa
Hitady lalam-barotra eto an-drenivohitra no anton-dian’ireo kaoperativa avy ao amin’ny kaomina Anivorano ireo. Mampiroborobo ny fananana asa ny fambolena any an-toerana noho izy rafitra mifampiankina. Telo taona izay no nijoroan’ny kaoperativa ao Anivorano ary miisa 166 ireo mpikambana izay efa mamokatra avokoa ny ankamaroany. Ankoatra ny lalam-barotra, miezaka mitazona ny kalitaon’ny vokatra ny kaoperativa mba hampiavaka ny voka-pamboleny amin’ny hafa sy hitazomany ny kalitaony. Maro, hoy izy ireo, no efa manafangaro ny vary manitra amin’ny vary hafa.
Ankilany, niakatra ho 33 000Ar ny 5 kilao amin’ny vary manitra raha toa ka 30 000Ar izany teo aloha, hoy ny mpandraharaha iray. Mahatonga izany, hoy izy, ny faharatsian’ny lalana sy ny fitaterana ny vokatra.
Henintsoa Hani
French