Randrianarisoa Dinah, fantatra amin’ny anarana MC Dinah eo anivon’ny tontolon’ny hira sy ny fitendrena gitara ary ny famoronana. Taona 2016, nifoha ny aingam-panahy hoentiny mamoron-kira. Nohalalininy ihany koa ny fomba fitendrena ny gitara. Voaforony ny « Let’s sing together », hira voalohany. Noho ny fifampikasohany tamina mpanakanto hafa, tahaka an’i Fy Rasolofoniaina, Eddie Rakotondrazay, Masnad sy ireo maro hafa, nitombo ny fahaizany sy ny fahafehezany ny kanto. Nisy fotoana nakan’i MC Dinah bahana… Ny taona 2019, rehefa niorim-ponenana any Toamasina izy no nahatsapa fa tsy hay vonoina na kosehina ny fitiavana lalina ny kanto an-kira sy ny fitendrena gitara ao anatiny, ka nanapahany hevitra fa hanohy ny lalany izy.
Taona 2020, nizara miandalana ny talentany tamin’ny alalan’ny fanaovana seho teny anivon’ny toeram-pisakafoana sy tany an-tokantranon’ireo olona tsotra liana amin’ny kanto voiziny i MC Dinah. Tazana sy heno eny anivon’ireo tambajotran-tserasera maro ihany koa ankehitriny ireo vazony.
Maherin’ny 15 ny sanganasany ankehitriny. Andalana amin’ny fandraisam-peo azy ireo izy. Nampanantena i MC Dinah fa tsy midika fandaozany tanteraka ny sehatra akory ny fahanginana tato ho ato fa mbola vonona hampiasa ny talentany hatrany izy.
Nanangona :
HaRy Razafindrakoto
French