TSELATRA

Fasana telo indray no nisy namaky tao Tanambao, fokontany Ambatomitsangana, kaominina Ampanotokana, Ambohidratrimo, ny alahady teo. Olona handeha haka kitay no nahatsikaritra ireo fasana misokatra. Lasa ny ankamaroan’ireo razana tao am-pasana.
Nijoalajoala ny afo noho ny firehetana tao amin’ny sambo niantsona tao Mahajanga Be, omaly. Namboarina teo amin’ny seranana ity sambo ity ka vokatry ny pitik’afo tamin’ny fitaovana nanamboarana azy no nitarika ny firehetana. Tonga namono ny afo ny mpamonjy voina.
Hita faty nihosin-dra teo amin’ny sisin-tanimbary ao Ambohibarikely, kaominina Ampahimanga, afakomaly ilay ankizivavy 9 taona nifampitadiavan’ny fianakaviany. Niharan’ny fanolanana izy sady notsatohan’ireo jiolahy antsy ny tendany. Tsy vitan’izay fa nalevin’izy ireo teo amoron-tanimbary ny fatiny.