Kihon-dalana goavana amin’ny Barea de Madagascar ny lalao roa voalohany amin’ny fiadian-toerana ho an’ny “Can 2025”, taranja baolina kitra. Tanjona ny hakana isa 6 manoloana an’i Tunisie sy i Comores, hoy ny Me Rôrô.
Ny talata lasa teo, vao tafaverina an-tanindrazana ny Me Rakotondrabe Romuald (Rôrô). Omaly, nitafa tamin’ny mpanao gazety tetsy amin’ny biraon’ny federasiona malagasin’ny baolina kitra (FMF), Isoraka izy. Nambarany fa raha te hanao Can 2025, mila maka isa 6 amin’ireo lalao roa voalohany, hikatrohana amin’i Tunisie ny 5 sy amin’i Comores ny 9 septambra ho avy izao. “Tsy vitan’ny vava anefa izany fa eny ambony kianja mahita azy”, hoy izy.
Tsy mitovy intsony anefa ny zava-misy tamin’ny 5 taona lasa raha ny fijeriny ny lalao hikatrohana amin’i Tunisie, satria tsy i Tunisie sy ny Barea tamin’izany intsony no hiaona amin’izao. Ny amin’ny tsy filalaovana eo Mahamasina, efa niomanan’izy ireo ara-tsaina. Raisiny ho tombony ny fifandonana amin’i Comores, ao Tunisie noho ny tsy fisian’ny fifindrana toerana izay miteraka fikorontanana, eo amin’ny mpilalao. Nitondrany fanazavana ny amin’i Ajorque, izay nanapa-kevitra ny tsy hanao Barea satria tsy mihevitra ny tenany ho Malagasy ary mamela ny toerany ho an’ireo mpilalao zandry. Ny amin’ny toeran’i Couturier, heveriny hisolo azy, i Johan N’Zi mpilalaon’ny Lokomotiv Plovdiv. Ny amin’ny fanaovana lalao tsapa, notsoriny fa tsy hisy intsony ny fotoana amin’izany noho ny fisian’ireo mpilalao sasany mbola hiatrika fihaonana ao amin’ny kliobany ny 1 septambra. Noho izany, hanomboka ny 2 septambra ho avy izao vao hisy fampivondronana miaraka ho an’ireo mpilalao 26.
Farany, nilaza izy fa tsy manana olana ho an’ny mpilalao ary misokatra ho an’ny rehetra ny varavaran’ny ekipam-pirenena fa miankina amin’ny fahaizany sy ny zava-bitany ny hiantsoana azy ireo.
Tompondaka
French