Nifarana omaly, ny fivoriambe iraisam-pirenena momba ny Fifanarahan’i Nairobi (Cop11). Nasongadina fa i Madagasikara dia firenana fikarohana vahaolana sy fandraisana andraikitra.
Lohahevitry ny Cop11, natao teto Madagasikara, ny « Fiaraha-miasa isam-paritra ho an’ny toekarena manga maharitra, fanatsarana ny fitantanana ny ranomasimbe Indiana Andrefana ». Raha aravona, miisa telo ny krizy mitranga maneran-tany: ny fahaverezan’ny karazan-javamananaina an-dranomasina, ny fandotoana an-dranomasina ary ny fiovan’ny toetr’andro. Nasongadina fa ohatra alain-tahaka i Madagasikara, satria firenena fikarohana vahaolana sy fandraisana andraikitra.
Nampahafantarina nandritra ny fivoriana ny zava-bita avy amin’ny volavolan-kevitra tapaka tamin’ny Cop 9 sy ny Cop 10. Nodinihina ny fandaharanasa iombonana hotanterahina amin’ny taona 2025 hatramin’ny taona 2028.
Nilaza ny minisitry ny Tontolo iainana sy ny fampandrosoana maharitra (Medd), Max Andonirina Fontaine, omaly, fa anisan’ny lalan-tsaina naseho ny fahaizan’i Madagasikara amin’ny lafiny diplaomasia maitso. Nisy ny adisisika natao amin’ny lafiny fitantanana ny fari-dranoamasina tsy misy tompony. Eo koa ny toeran’i Madagasikara amin’ireo fivoriambe iraisam-pirenena hafa, toy ny Fifanarahan’ i Rio mahakasika ny karazan-javamananaina, ny fiovan’ny toetr’andro, ny fahangazanan’ ny tany.
Fivoriana avo lenta
Natao nandritra ny andro voalohany ny fivorian’ny mpiara-miombon’antoka samihafa, ara-bola sy ara-teknika, toy ny Usaid, ny Foibem-pikarohana, ny sehatra tsy miankina, sns. Ho an’ny masoivohon’ireo firenena miisa 11 ao anatin’ny Cop 11 ny andro faharoa. Fivoriana avo lenta, nihaonan’ny minisitra voakasika (4 ho an’i Madagasikara, 5 ho an’ireo firenena vahiny), miampy ny filohan’ny delegasiona ary ny tale mpanatanteraka isan-tsokajiny kosa ny andro fahatelo.
Marihina fa voatazona ho minisitry ny Tontolo iainana sy ny fampandrosoana maharitra i Max Andonirina Fontaine, nandritra ny fanendrena ny mpikambana ao amin’ny governemanta, omaly.
Njaka
Andriantefiarinesy
French