Maty tsy tra-drano ny raim-pianakaviana iray 40 taona voadonan’ny fiara teny Ankorondrano, ny alin’ny alarobia teo, tamin’ny 8 ora sy fahefany. Niampita arabe, tsy nahita ny fiara nandalo tampoka io lehilahy io. Tetsy ankilany, nandeha mafy ilay fiara marika starex. Vokany, voadona izy ka nitsirara tamin’ny tany. Niezaka nanavotra ireo nanatri-maso. Nentina nihazo ny sampana vonjy aina teny amin’ny hopitaly io niharam-boina io. Tsy tana ny ainy. Nohazonin’ny mpitandro filaminana hatao famotorana ny mpamilin’ny fiara.Naiditra am-balam-pamonjana ny fiara.
Nandeha mafy
Lehilahy nitondra scooter koa nidona tamin’ny fiara amoron-dalana, teny amin’ny lalam-baovao Ambohitrimanjaka, afakomaly alina. Nandeha mafy io mpitondra moto io, araka ny fanazavan’ny nanatri-maso. Efa saika nitera-doza voadon’ny fiara ilay mpitondra moto minitra vitsy talohan’ny fahavoazany. Nisy fiara nijanona amoron-dalana, nanana olana teknika, ka nifatratra tamin’ny vodin’io fiara io ilay lehilahy sy ny moto nentiny. Nandriaka ny ra, nentina nihazo ny hopitaly izy. Potika tanteraka ny moto.
Tsiferana R.
French