Mankalaza ny faha-50 taonany amin’ity taona 2024 ity, ny klioban’ny Akka, taranja karate-do. Hisy ny fifaninanana hoenti-manamarika izany dia ny “Coupe 50ème”, ny 14 sy 15 septambra izao, eny amin’ny Kianja mitafon’Ankorondrano. Kata sy Kumite ho an’olon-tokana no hikatrohana. Hisy koa ny fifaninanana isam-bondrona, handraisan’ny “style” 4 anjara, araka ny fanazavan’ny Sensei Rajaonarison Christian. Notsiahivin’ny filohan’ny komity mpikarakara fa nasaina avokoa ireo klioba rehetra manerana an’i Madagasikara, efa nahazo fankatoavana tamin’ny federasiona sy ny ligy rahateo izy ireo amin’izany. Tsy hisy ny saram-pandraisan’anjara mandritra ity fifaninanana fankalazana ity, izay sambany no nisy. Tsiahivina, efa nosokafana ny volana jolay teo ny fankalazana ary hifarana eny amin’ny Espace Rose By-pass, ny volana oktobra izao. Manodidina ny 80 amin’izao ny mpikatroka eo anivon’ny Akka ary efa betsaka ny mpianatra nivoaka tao amin’ity klioba ity, anisan’izany ny mpanohana ny fankalazana, i Shahin Cassam Chennai, avy amin’ny Chocolaterie Tsara. Nambaran’ity farany fa zava-dehibe izany fankalazana ny faha-50 taona izany ka mendrika hotohanana. Anisan’ny manohana ny Akka ihany koa i Ylias Akbaraly, avy amin’ny Fondation Akbaraly sy i Shahine Mohamed Reza, avy amin’ny Serviette Pastel.
Mi.Raz
French