Seranam-piaramanidina Ivato : tafapetraka ny rantsa-mangaikan’ny Bianco

Tafapetraka, omaly, ny rantsa-mangaikan’ny Birao mahaleo tena iadiana amin’ny kolikoly eny anivon’ny seranam-piaramanidina Ivato. Mba hahafahana mandray ny fitarainana momba ny kolikoly ny ivontoerana

Natao handraisana ny fitarainana mahakasika ny kolikoly sy ny tsy fa­narahan-dalàna miseho eny an-toerana ity rantsan’ny Bian­co ity. Hanentanana ny mpiasa sy ny mpandeha rehetra mba handa kolikoly ary handray fepetra hisorohina izany. Misy ny fiaraha-mientana amin’ny rehetra satria raharaham-pirenena ny ady atao amin’ny kolikoly. Tanjona ny hikendrena ny tombontsoa ho an’i Madagasikara sy ny vahoaka malagasy. «Anisan’ ny fitaratr’i Madagasikara ny seranam-piaramanidina Ivato. Migoka ny vokatra tsara amin’izany ny Malagasy rehetra raha tsara ny fitantanana eny ary toy izany koa raha ratsy », hoy ny tale jeneralin’ny Bian­co, Razakamanantsoa Gaby Nestor, nandritra ny lahateniny. Ho voasoroka mialoha eny amin’ny seranam-piaramanidina Ivato ny endrika kolikoly sy ny fanondranana tsy ara-dalàna amin’ny endriny rehetra amin’ny fametrahana io rantsa-mangaika io.

Apetraka ny paikady rehetra
Ezahina ny hametrahana sy hanatsarana ny fomba fiasa eo amin’ireo mpiara-miasa hiandry raharaha, na andro alina na atoandro, toy izany koa ny fifandimbiasana ao anatin’ny fotoana izay ho faritana mialoha. « Misy ny fiaraha-miasa amin’ny fadintseranana, ny CSI ary ireo mpiara-mikatroka rehetra anatin’ny sehatra », hoy hatrany izy. Hatsaraina ny fametrahana ny laharana maitso hampiasan’ny bianco, an­draisana ny fitarainana mahakasika ny kolikoly. “Anisan’ny tombony amin’ny rantsa-mangaika ny fahafahana mandray mivantana ny trangan-javatra iray mety ahitana kolikoly na olona niharan’ny kolikoly eny anivon’ny seram-piaramanidina Ivato”, hoy kosa ny tale jeneralin’ny fadintseranana, Lainkana Za­fivanona Ernest. Mametraka ny fanabeazana, fiarovana ary fanenjehana ny eny anivon’ny fadintseranana mandritra izany.

Mino

.